Кабалјеро на најдобар можен начин опиша што мисли за Гвардиола

Вили Кабалјеро го продолжи договорот со Челси пред неколку дена и стана јасно и дека четврта сезона ќе биде дел од лондонскиот клуб, а добро познато е дека од претходно веќе имаше искуство во Премиер лигата како голман на Манчестер Сити.

Аргентинецот пристигна во Англија во 2014-та година по барање на тренерот Пелегрини, но две години подоцна, имаше можност да соработува и со Пеп Гвардиола, човекот кој според него е неверојатен фудбалски стратег кој прави да се чувствувате како секој ден да одите на универзитет.

Кабалјеро не штедеше комплименти за посветениот Пеп и покрај тоа што само една сезона соработуваше со него, а посебно го импресионирало тоа што имал идентичен третман за сите, без разлика на името и големината.

– Кога работите со Пеп, тоа е исто како да одите на универзитет. Секој ден учите нешто ново. Ако не ве учи нешто ново на теренот, ви кажува преку видео. Кога ви проѓа блиску, има неверојатни детали и ве учи нешто ново за противникот и за играта, – вели Кабалјеро за „ТНТ Спортс“.

– Исто така, добро кај него е што нема проблем да го крена гласот на некој клучен стартер, на замена, на некој што има 34 години. Тој не бира, станува збор за фантастичен педагог и навистина знае како да се носи со сите,- завршува Вили.