Јувентус заинтересиран за спортскиот директор на шпански клуб

Раководството на Јувентус подолг период е во потрага по долгорочно решение за позицијата спортски директор, а минатиот период најчесто се споменуваше името на Фредерик Масара, кој е прв соработник на Паоло Малдини во Милан.

Сепак, „Тутоспорт“ тврди дека во клубот се почесто се зборува и за друга солуција, односно Андреа Берта, актуелниот спортски директор на Атлетико Мадрид.

Берта ги импресионирал „бјанконерите“ со одредени трансфер потези во периодот кога Атлетико немаше големи финансиски ресурси, со стратегијата за младите фудбалери на шпанскиот клуб, како и при преговорите за ангажман на Алваро Мората.

Масара е главен противкандидат на Берта, а негова предност покрај сработеното во Милан е долгото пријателство со Макс Алегри, со кои биле соиграчи за време на фудбалската кариера.

Актуелниот спортски директор Федерико Керубини е планиран на друга позиција, па затоа раководството бара конкретна замена со искусен спортски директор.