Јувентус се „откачи“ од уште еден играч кој важеше за миленик на Алегри

Менаџментот на Јувентус направи голема реконструкција во летниот преоден рок, па тргнувајќи од новиот тренер Тиаго Мота, големи промени ќе има и во составот кој ќе треба да го носи товарот на повеќе фронтови.

„Бјанконерите“ ставија на трансфер листа и испратија во други клубови поголем број фудбалери, а дел од нив досега важеа за миленици на претходниот тренер Макс Алегри и наводно остануваа во составот на негово инсистирање.

Еден од нив е Матија Де Шилјо, кој од денеска е нов член на Емполи, со што Јувентус успеа да го реши и овој случај во кој споменатиот фудбалер воопшто не беше во плановите на тренерот Мота.

Емполи ќе добие солидна алтернатива на дефанзивните позиции со Де Шилјо, а интересно нема да плати ништо за овој трансфер. Главна цел на Јувентус беше да се ослободи од годишната плата на фудбалерот, која изнесува 1,5 милиони евра, но на крајот сепак веројатно ќе мора да покрива дел од неа барем до следното лето.

Клубот од Торино го ангажираше Де Шилјо во 2017 година, а во меѓувреме тој помина една сезона на заем во Лион и забележа 117 настапи за црно-белите, со кои стигна до три скудета.