Јувентус конечно договори трансфер за кој преговараше долг период

Реконструкцијата на првиот тим на Јувентус по доаѓањето на Тиаго Мота очекувано подразбира и неколку засилувања кои треба да го комплетираат ростерот на тимот од Торино, а по долги преговори денеска е договорен трансфер за кој се зборува подолго време.

Раководството на „бјанконерите“ долг период преговараат за потписот на Нико Гонзалес од редовите на Фиорентина, а денеска конечно двете страни си подале рака и Аргентинецот ќе пристигне на прегледи во медицинскиот центар на Јувентус.

Гонзалес имал повеќе понуди, но инсистирал на трансфер во Јувентус и одамна ги имаше договорено личните услови со раководството на клубот.

Фиорентина десетина дена не ги прифаќаше понудите на ривалот кои надминуваа 30 милиони евра, за денеска да биде официјализиран пакетот кој ќе вклучува фиксна сума и одредени бонуси за активирање.

Јуве допрва ќе ги потврди финаниските параметри, но последните најави се дека вкупната сума нема да надмине 38 милиони евра.

Гонзалес дојде во Фиорентина од Штутгарт во 2021 година, а ќе биде уште еден играч кој од Фиренца ќе се пресели во редовите на „бјанконерите“.