Јувентус ќе профитира од потписот на Шчесни за Барселона

Војчех Шчесни речиси сигурно ќе ја засили Барселона како итно решение по повредата на Марк-Андре Тер Штеген, а ваквиот расплет на случувањата оди во прилог и на неговиот поранешен клуб Јувентус.

Полјакот и Јувентус постигнаа договор за завршување на соработката една година пред истекот на договорот, со исплата на 4 милиони евра на сметката на голманот, но во истиот договор имало и клаузула со која италијанскиот клуб сакал да се заштити од актуелното сценарио.

Шчесни ќе заработи двојно помалку ако потпише за друг клуб во одреден временски период, а бидејќи тоа ќе се случи деновиве, полскиот голман ќе му заштеди на Јуве сума од 2 милиони евра.

Тренерот Ханси Флик го издвоил токму Шчесни како свој прв фаворит да го замени Тер Штеген сезонава, а изјавите на полскиот интернационалец наведуваат на заклучок дека тој е подготвен веднаш да застане на голот на Барса.

Претходно, Шчесни објави дека ја завршува кариерата и ќе му се посвети на своето семејство, но повикот од шпанскиот великан очигледно лесно го премисли и ќе има можност за „второ пензионирање“.