Јувентус и Рома без муниција на вечерното дерби во Торино (Видео)

Јувентус и Рома не постигнаа ниту еден гол во Торино за реми (0:0) кое не ги исполни очекувањата на фудбалските фанови, а ќе им донесе по еден бод на двете екипи.

Во редовите на домашната екипа дебитираа новите засилувања Копмајнерс, Консеисао и Гонзалес, кои влегоа во вториот дел, исто како и Коне, кој имаше солидни први минути во дресот на „волчицата“.

Двете екипи не стигнаа до изразити шанси и големи проблеми за голманите Ди Грегорио и Свилар, а најсериозните обиди беа дело на Влаховиќ и Анхелињо, кој во финишот испрати опасен удар покрај голот на Јувентус.

Со ова реми, Јувентус го загуби перфектниот учинок, но со 7 бодови е на делба на првото место со уште неколку екипи, додека Рома стигна до само втор бод по првите три рунди во Серија А.

На вториот натпревар, Удинезе го победи Комо со 1:0 со голот на Бренер, а Кутроне не реализираше пенал во судиското надополнување.