Јувентус го потврди списокот за ЛШ, младите надежи ослободија простор за едно изненадување

Италијанскиот клуб Јувентус денеска го потврди списокот со фудбалери кои ќе имаат право на настап во Лигата на шампионите, а очекувано на истиот се најдоа осумте летни засилувања на „бјанконерите“.

Сериозната реконструкција донесе многу промени во тимот на новиот тренер Тиаго Мота, па Јуве се враќа во Европа со сериозно изменет состав откако направи една година пауза од куповите во организација на УЕФА.

Копмајнерс, Гонзалес, Консеисао, Тирам, Даглас Луиз, Калулу, Кабал и Ди Грегорио ќе добијат ваква шанса и за најголем дел од нив ова ќе биде прв настап во најелитното европско натпреварување, а интересно, на Б листата се најде новата „десетка“ Кенан Јилдиз.

Турскиот интернационалец е еден од најважните играчи во актуелниот проект предводен од Мота, но благодарение на сезоните поминати во младинската академија, односно вториот тим, ќе може да настапува без да зафаќа простор на А листата, на која има место само за 25 фудбалери.

На ист начин се пријавени и Мбангула и Савона кои веќе добија солидна минутажа во Серија А, а ваквата опција му овозможи на Јувентус да го пријави за настап дури и Артур. Бразилецот не е во плановите на италијанскиот клуб, но досега не успеа да си обезбеди нова дестинација, па „бјанконерите“ го вклучиле на списокот за во случај да нема промени до крајот на преодниот рок во земјите каде се уште трае.