Јувентус ги интензивирал преговорите за дефанзивец од холандското првенство

Долгата рехабилитација на Глеисон Бремер и Хуан Кабал отвори сериозна потреба од засилувања за одбраната на Јувентус, а спортскиот директор Кристијано Џунтоли веќе потврди дека клубот ќе биде активен на трансфер пазарот во јануари.

Приоритет е токму дефанзивната линија, а „Тутоспорт“ тврди дека Џунтоли и тренерот Тиаго Мота се согласиле околу еден конкретен чекор, односно обид за ангажирање на Давид Ханко од редовите на Феенорд.

Словачкиот репрезентативец игра квалитетно во составот од Ротердам и го привлекол вниманието на Јувентус, а Џунтоли поради него го следел и дуелот на Сити и Феенорд. Од друга страна, медиумот од Торино пренесува дека и агентот на Ханко бил на трибините на „Алијанц“ на неодамнешното соочување меѓу Јувентус и Сити во Лигата на шампионите.

Цената на Ханко е најмалку 35 милиони евра, па „бјанконерите“ ќе се обидат да го доведат првично на заем, за инвестицијата да ја комплетираат во летниот преоден рок.

26-годишниот фудбалер може да игра како стопер и лев бек и тоа оди во прилог на актуелните потреби, а веќе има искуство во Италија откако кратко беше член на Фиорентина.