Јуриќ: Тешко е да победите кога се прават грешки како онаа на Залевски (Видео)

Иван Јуриќ оди по „тенок мраз“ и италијанските медиуми веќе шпекулираат за кандидатите кои можат да го наследат како тренер во Рома, но Хрватот до овој момент не ги слуша најавите од угледните новинари и си тера по свој терк.

Денешниот пораз од Верона на гостувањето на „Бентегоди“ донесе сериозен потрес во италијанската престолнина и голем дел од медиумите бараат отказ за наследникот на Де Роси, но и во лошо издание како ова денеска, Јуриќ сепак гледа позитивни сигнали кои му даваат надеж за менување на ситуацијата.

– Сакам да потенцирам дека Рома играше добро денеска, но направивме почетнички грешки и скапо плативме за тоа. Исто така, сакам да нагласам дека и судијата направи грешка и не досуди чист прекршок врз Ндика при вториот гол на Верона.

– Жалам за момците, дадоа се од себе и имаа добар интензитет. Прикажаа добар фудбал, имавме добри шанси, но на крајот плативме за грешките и неточните додавања. На крајот, пресудна беше една контра која заврши со гол во нашата мрежа, – изјави Јуриќ, кој ја коментираше аматерската грешка на Залевски кога му ја додаде топката на Тенгстет во акцијата за првиот гол.

– Ни се повторува истото, правиме огромни грешки. Ова не се обични грешки, ова се огромни грешки. Подаваме директно на противникот, а во такви ситуации е тешко да победите. Се надевам дека овој момент ќе помине, верувам во овие играчи, мора да веруваме во тоа што го правиме, – додаде Хрватот по поразот од 3:2.

Што се однесува до Залевски, ова беше втора огромна грешка во краток временски интервал, бидејќи истиот играч кумуваше и во поразот од Интер во дербито на „Олимпико“.