Јуриќ со несекојдневна изјава ги воодушеви навивачите на Атлетик по ремито на „Олимпико“

Рома и Атлетик Билбао ги поделија бодовите на стартот на новата сезона во Лигата на Европа, но по крајот на мечот, во фокусот за шпанските медиуми се најде Иван Јуриќ.

Новиот тренер на Рома е познат по тоа што отворено говори пред новинарите и дека нема влакна на јазикот, па така со својот заклучок кој го даде за Атлетик експресно стана омилен лик во Баскија.

Хрватскиот стручњак заклучи дека „Атлетик е баскиски, а не шпански клуб“, а со оглед на тоа што Баскија како автономна заедници со години сака да се отцепи од Шпанија, оваа негова изјава брзо стана најсподелувана од медиумите на Пиринеите.

– Имавме контрола врз Атлетик во првото полувреме и игравме добро. Атлетик е тим кој игра на свој препознатлив начин, со долги топки ги бара своите брзи напаѓачи.

– Атлетик е баскиски тим, а не шпански! Тие не играат стандарден шпански фудбал со многу посед и допири на топка, го играат сосема спротивното, – гласи изјавата на Јуриќ.