Јуриќ го врати во првиот тим играчот кој беше „замрзнат“ од Де Роси

Изминатите 72 часа донесоа големи турбуленции во Рим и ситуацијата во Рома се уште не е воопшто мирна, но новиот тренер Иван Јуриќ веќе почна да ја извршува својата работа и да ги влече првите потези.

Тифозите на Рома се разочарани од раководството на клубот кое му врачи отказ на Даниеле Де Роси и најавија дека ќе го бојкотираат натпреварот против Удинезе, па иако Јуриќ засега ја нема поддршката од верните навивачи, се верува дека ќе може да го промени мислењето ако почне да остварува добри резултати.

Искусниот хрватски стручњак ќе дебитира во недела на „Олимпико“, а во увертирата за овој меч, решил да го „одмрзне“ играчот кој беше отстранет од првиот тим на Рома.

Никола Залевски не го реализираше трансферот во Галатасарај на крајот на минатата недела и после сите перипетии остана во Рома, па клубот во договор со тренерот Де Роси реши да го „замрзне“ и да го отстрани од тимот на неодредено време.

Десет дена подоцна, Јуриќ решил да има конструктивен разговор со фудбалерот и му одобрил да се приклучи на тренинзите, па сега Хрватот ургирал и за брзо решавање на ситуацијата во вид на нов договор за полскиот репрезентативец.