Јокиќ со брутално издание ја доби кошаркарската драма со Дончиќ (Видео)

Пресметките меѓу Никола Јокиќ и Лука Дончиќ секогаш привлекуваат огромно внимание во НБА лигата а двете балкански ѕвезди со својот пријателски однос прават нивните натпревари да бидат уште посимпатични за јавноста во Америка.

Рано утрово, натпреварот меѓу Денвер и Далас понуди вистински спектакл во „Бол арената“, но и неверојатна драма која траеше до последната секунда.

Далас влезе со предност од 118:120 на 50-тина секунди пред крајот, но потоа Денвер двапати погоди преку Јокиќ и Портер за минимална предност, со која се влезе во последните 6 секунди од мечот (122:120).

Расположениот Кајри Ирвинг ја доби честа да шутира за победа, но неговиот обид за три заврши неуспешно, по што Јокиќ со дефанзивен скок го реши прашањето околу победникот.

На овој начин, Србинот го комплетираше своето вонсериско издание во секој поглед, бидејќи покрај тоа што помагаше во одбрана, беше неверојатен и во напад.

Јокиќ имаше брутално издание и го заврши мечот 37 поени, 18 скокови и 15 асистенции, додека Дончиќ на спротивната страна исто така беше блиску до трипл-дабл и забележа 24 поени, 9 скокови и 9 асистенции. Најдобар поединец во поразениот тим беше Кајри Ирвинг со 43 поени, додека од огромна помош на Јокиќ во победата му беа Мареј, Портер и Вотсон кои уфрлија по 18, 17 и 16 поени.

Luka Doncic et Nikola Jokic se sont retrouvés cette nuit 😂pic.twitter.com/Ch8vYx2iXc

— First Team (@FirstTeam101) November 11, 2024