Јанис блескаше во новиот триумф на Милвоки, победничката серија ја продолжи и Бостон (Видео)

Денешната НБА програма понуди четири натпревари и посебно до израз дојдоа домашните екипи, бидејќи победи остварија сите тимови кои играа пред домашната публика.

Милвоки и Бостон продолжуваат со добрите изданија и славеа над Чикаго и Њујорк, но победи прокнижија и Сакраменто и Торонто во пресметките со Кливленд, односно Вашингтон.

Јанис Адетокумбо повторно дојде до израз и беше најдобар поединец на паркетот, бидејќи во победата на „елените“ запиша 35 поени и 11 скокови, дабл-дабл кој беше повеќе од доволен за сигурен триумф од 118:109.

Бостон благодарение на тимската игра стигна до третата победа во низа и вкупно осма од стартот на сезоната, а како по обичај, најдобар беше Тејтум кој постигна 35 поени, на кои придодаде и 6 скокови и 7 асистенции.

Победата на Сакраменто ја обезбедија Фокс и Мареј со 28 и 25 поени, додека Сиакам постигна дури 39 поени и беше најдобар поединец во победата на Торонто.