Јамал правеше чуда, но Барселона остана без победа во 94. минута (Видео)

Фановите на Барселона на најдобар можен начин го дочекаа поразот на Реал Мадрид на гостувањето на „Сан Мамес“, но иако денеска се чинеше дека ќе имаат нов добар повод за славје, на крајот не дојде до посакуваното сценарио.

Барса на двапати водеше на жешкото гостување на „Бенито Виламарин“ и изгледаше дека ќе освои големи три бода против Бетис, меѓутоа така не мислеа и Руибал и Диао кој креираа акција за реми во 94-та минута.

Каталонскиот гигант поведе со голот на Роберт Левандовски во првиот дел и на полувреме се замина со резултат 0:1, но Бетис заслужено стигна до израмнување во вториот дел и тоа се случи со удар од белата точка.

Ло Селзо беше прецизен реализатор и донесе френетични завршни 30 минути, во кои Барселона повторно дојде до предност благодарение на генијалниот Јамал, но сепак не успеа целосно да профитира од магијата на тинејџерот.

Ламин правеше чуда и со низа слаломи воодушеви на теренот, а воедно и мајсторски асистираше до Феран Торес за предност од 1:2 во 82-та минута.

Овој резултат беше активен и во судиското продолжение, но во 94-та минута пристигна голот на Диао по асистенција на Руибал и така пропадна во вода уште една планирана победа на каталонците.

Слаломот на Јамал погледнете го ТУКА

Асистенцијата на Јамал погледнете ја ТУКА

Голот на Диао погледнете го ТУКА