Ивановски сопрен во осминафиналето на силниот Челинџер во Словачка

Калин Ивановски се намачи да стигне до главната фаза на Челинџерот во Братислава и мораше да ги мине квалификациите, но откако оствари победа во првата рунда и се пласираше во осминафиналето, најдобриот македонски тенисер денеска беше стопиран во оваа фаза.

По трите триумфи над респектабилни ривали, Ивановски денеска го заврши својот настап на Челинџер 125 турнирот во Словачка, откако за нешто повеќе од еден час игра беше поразен од Мартин Дам од Америка.

Калин ја пропушти својата шанса во првиот сет кога не ја искористи првата брејк топка на мечот, а бидејќи го загуби својот следен сервис гејм, работите тргнаа во погрешен правец.

Минималната предност беше доволна за Американецот да поведе со 6:3, а потоа повторно одлучи еден брејк во вториот кој заврши со 6:4.

Наградниот фонд на Челинџерот во Словачка изнесува 145 илјади евра и ова е ново искуство за Ивановски, кој поради влезеот на главниот турнир и победата во претходната рунда, сигурно ќе напредува на најновата ранг листа.