Ивановски сопрен на стартот: Калин не ја мина првата пречка во Трнава

Калин Ивановски се закити со трета професионална титула на крајот на минатата недела откако славеше на турнирот во Мадрид, но за жал истата форма не ја пренесе и на ИТФ фјучерсот во Словачка.

Најдобриот македонски тенисер доживеа пораз во воведната рунда на главниот турнир во Словачка, иако воведниот сет не навестуваше такво нешто.

Калин отвори подобри и го доби воведниот сет со 7:5, но Чехот Павел Неједли имаше повеќе мир и умешност во наредните два сета, славејќи со 6:4 и 6:3.

Акумулираниот замор и честите патувања дефинитивно не му помогнаа на Ивановски на денешниот меч, по кој многу рано стави крај на своето учество во Словачка.

Инаку, идентично како во Мадрид, турнирот во Трнава се игра на тврда подлога и неговиот награден фонд изнесува 15 илјади американски долари.