Ивановски пропушти голема шанса во вториот сет, па доживеа елиминација во Роверето

Калин Ивановски вчера преку драма беше подобар од Алекси Готие од Франција и се пласираше во завршното квалификациско коло на АТП Челинџерот во Роверето, каде денеска за жал не успеа да го мине финалниот бараж пред главниот турнир.

Најдобриот македонски тенисер лошо го отвори денешниот меч против Богдан Павел и веќе во воведниот гејм дозволи да биде направен брејк, што секако беше голем плус за самодоверба кај Романецот.

Понесен од доброто отворање, ривалот лесно го доби првиот сет со 6:2, но тоа не беше случај и во вториот каде Ивановски заигра далеку подобро.

Калин понуди голема борба и успеа да направи пресврт на средина на вториот сет, па дури и сервираше за израмнување на 1:1 во сетови.

Македонецот водеше со 5:3 и при 5:4 имаше свој сервис за израмнување, но за жал не успеа да го искористи тоа и дозволи брејк кој влијаеше многу негативно врз неговата самодоверба.

Во продолжение, дозволи уште два гејма во низа на Романецот, па така Павел со четири гејма во серија запиша победа со 6:2 и 7:5.