Ивановски го развиори македонското знаме на крајот на маратонот, Тола го освои златото со нов олимписки рекорд

Дарио Ивановски си го оствари својот сон и стана првиот македонски олимпиец кој завршил една маратонска трка, откако денеска успеа да пристигне на финишот во Версај и да го развиори македонското знаме.

Најдобриот атлетичар од нашата земја се најде во конкуренција на најелитните светски маратонци, па и покрај сите проблеми кои ги имаше пред и за време на трката, успеа да смогне сили и да притигне на финишот.

Ивановски не беше во својот посакуван ритам поради одредени проблеми и тоа беше евидентно за време на секое мерење на пет километри, па на крајот оствари време кое е 20 минути послабо од неговиот личен рекорд, кој всушност е и национален рекорд.

Дарио истрча за време од 2:08.26 часа на маратонот во Севилја оваа година, а денеска пристигна на целта како 69-ти со време од 2:28.15.

Ивановски сигурно ќе собере големо искуство од оваа трка и ќе ја искористи истата како мотив за во иднина, бидејќи повеќе од јасно е дека има многу поголем потенцијал од тоа што го прикажа денеска.

Кога е во прашање поредокот при самиот врв, првото место го освои Тамират Тола од Етиопија кој го освои златниот медал, додека среброто и бронзата им припадна на Абди Башир од Белгија и Бенсон Кипруто од Кенија.

Победникот Тола ја заврши трката со време 2:06:26, што всушност е и нов олимписки рекорд.