Италијанските судии ги признаа најголемите ВАР грешки, Роки бара построги казни за инцидентите

Италијанската асоцијација на фудбалски судии денеска одржала средба со медиумите, а на истата Џанлука Роки презентирал дел од утврдените грешки во првиот дел од сезоната на Серија А, истовремено барајќи поголема заштита за судиите.

Одговорниот за делегирање смета дека дисциплинската комисија не презема сериозни мерки во однос на доделените казни и судиите постојано се навредувани или под закана од напад, наведувајќи ги двата последни примери.

– Орсато бил навредуван на последното градско дерби во Купот, додека Гуида едвај избегнал физички напад во Салерно. Мислам дека е доста во однос на толерирање на вакви испади, мора да го користиме примерот на УЕФА и виновниците да бидат строго казнети, – рекол Роки.

АИА објавила список со утврдени грешки кои не биле коригирани со ВАР технологијата, а генерално тоа се грешки за кои медиумите и пишуваа изминатиот период.

Јувентус два пати бил оштетен бидејќи противнички играчи не добиле чисти црвени картони (Берарди од Сасуоло и Малиновски од Џенова), а еднаш не бил досуден пенал за противникот на „бјанконерите“ (старт на Илинг на дуелот со Болоња).

Интер пак дури два пати постигнал голови кои требало да бидат поништени поради прекршок (гол на Арнаутовиќ против Џенова и гол на Фратези против Верона), а грешки биле направени на уште неколку натпревари.