Италијано не е заинтересиран за Наполи, Де Лаурентис бира меѓу двајца француски тренери

Наполи остана без тренер по сезоната во која ја освои титулата, а клубот се обидува што побргу да донесе правилна одлука околу наследникот на Лучијано Спалети.

Претседателот Аурелио Де Лаурентис одамна мораше да се откаже од опцијата Луис Енрике, а добил негативен одговор и од Винченцо Италијано, кој реши да остане лојален кон Фиорентина и да ги води „виолетовите“ барем уште една сезона.

„Ил Матино“ кој е медиум добро упатен во случувањата во Наполи тврди дека во конкуренција за тренерската позиција сега се Руди Гарсија и Кристоф Галтие.

Гарсија до неодамна му беше тренер на Кристијано Роналдо во Ал Наср и добро зборува италијански од времето кога ја водеше Рома, додека Галтие нема да добие шанса од ПСЖ да го води тимот и следната сезона, па веќе е во потрага по нов ангажман.

Предност во опцијата Галтие е што неговото пристигнување може да го задржи Виктор Осимен барем уште една сезона, бидејќи тој соработуваше со Нигериецот додека двајцата беа во Лил.