Искусниот Хумелс позираше со дресот на новиот клуб

Искусниот Матс Хумелс си замина од Борусија Дортмунд по крајот на минатата сезона и ова лето се поврзуваше со доста екипи, но со ниту една од нив официјално не си подаде рака, поточно до денеска важеше за слободен агент.

Сега повеќе не е така затоа што тој беше потврден како нов член на италијанскиот прволигаш Рома. Матс долго време е на големата сцена со настапи за Борусија Дортмунд, Баерн Минхен и германската репрезентација, па иако во декември ќе го прослави 36 роденден тој дефинитивно ќе биде големо засилување за „волчицата“.

Матс се уште е квалитетен, стандарден, цврст во дуелите и заедно со Марио Ермосо дефинитивно ќе донесат нешто плус за клубот од „Олимпико“.

Тој е седми Германец кој ќе го носи дресот на Рома, клуб во кој ќе го има дресот со бројот 15.