Иско еуфорично го славеше голот против Реал, па се извини по големата победа на „Бенито Вилјамарин“

Иско Аларкон беше клучна алка во победата на Бетис над Реал Мадрид на „Бенито Вилјамарин“, не само поради постигнатиот гол од пенал, туку и поради фактот што беше крајно влијателен во играта на домаќините.

Поранешната ѕвезда на Реал се препороди во тимот на Пелегрини и повторно го игра најдобриот фудбал во Андалузија, но вчера малку ги изненади фановите на „кралскиот клуб“ поради емоцијата со која го славеше победничкиот гол.

Иско не ги криеше емоциите и заврши во прегратка на својата сопруга по постигнатиот погодок за 2:1, па по крајот на мечот мораше и да им се извинува на фановите на Реал.

– Головите носат емоции, а веднаш по постигнатиот погодок имав гест кон навивачите на Реал. Побарав прошка и се извинив, секогаш ќе го носам Реал во моето срце.

– Голот и го посветив на мојата сопруга која снима мал документарец за моето враќање од повреда. Потоа имав и гест со кој им се извинив на навивачите на Реал. Во Реал си ги остварив сите соништа и секогаш ќе ми биде овој клуб во срцето, – изјави Иско.