Интересен потег: Вардар го врати црногорскиот „бомбардер“ кој стана европски шампион во Скопје

Вардар настапи на двата подготвителни турнири во Струга и во Охрид и се закити со трофеј на вториот, но одиграните натпревари очигледно беа јасен сигнал дека на тимот му се потребни уште неколку квалитетни имиња.

Најтрофејниот македонски клуб ќе се обиде да ја прекине двегодишната доминација на Еурофарм Пелистер и за да го направи тоа потребно е искуство и квалитет, нешто што сигурно го поседува Вуко Борозан.

Вардар денеска ја информираше јавноста дека го враќа црногорскиот „бомбардер“ кој стана европски шампион во Скопје во 2017-та година, но кој исто така освои и три титули во домашното првенство, два Купа и три трофеи во СЕХА Лигата.

Борозан своевремено ги полнеше противничките мрежи со својот силен шут како член на Вардар, а сега стручниот штаб на клубот се надева дека ќе може да повтори слични партии и на 30-годишна возраст.

– Црногорскиот ракометар кој со Вардар во 2017 година стана европски првак, Вуко Борозан повторно ќе го облече „црвено-црниот“ дрес. Тој потпиша едногодишен договор со екипата со можност истиот да биде продолжен. Доаѓа како засилување за клубот пред почетокот на сезоната, а следната недела треба да се приклучи на тренизните на екипата, – информираа од Вардар.