Интер сака да заработи добро од Дамфрис, веќе има и план за неговиот наследник

Последните сезони Интер профитираше добро од трансфери на фудбалери кои пристигнаа во Италија за многу помали суми, а последниот случај беше со голманот Андре Онана.

Италијанскиот клуб планира истото да го направи и со Дензел Дамфрис, холандскиот бек за кого се интересираат премиерлигаши, а кои традиционално без проблеми можат да издвојат сума која ќе ги задоволи барањата на „нероазурите“.

Медиумите тврдат дека Интер нема да му прави проблеми на Дамфрис, кој очигледно е на мета на Челси и Манчестер Јунајтед, а веќе размислува и за неговиот наследник.

Се работи за Тејџон Буканан, канадскиот репрезентативец кој настапува за Клуб Бриж и веќе го привлече вниманието со своите настапи за националниот тим и својот прв европски клуб.

Цената на Буканан би требало да биде околу 15 милиони евра, додека Дамфрис би донел најмалку 40 милиони евра, од кои најголем дел се профит ако се спореди сумата која му беше платена на ПСВ за неговото доаѓање во Милано.