Интер повторно славеше во меч со седум погодоци, Специја го изненади Удинезе на Несторовски (ВИДЕО)

Екипата на Интер ја прокнижи втората сезонска победа во Серија А и тоа во уште еден меч со седум постигнати голови.

Во претходната рунда „нероаѕурите“ славеа над Фиорентина со 4-3 на „Џузепе Меаца“, додека пак вечерва издвојуваа триумф на гостувањето кај Беневенто со 5-2. Избраниците на Конте беа расположени за игра, а во прилог им одеше и тоа што домашните фудбалери одлучија да се надигруваат, да играат отворено.

Интер ова го искористи и со двата гола на Лукаку и по еден на Гаљардини, Мартинез и Хакими дојде до два од два во шампионатот. Кај домаќините двоен стрелец беше Капрари.

Илија Несторовски влезе во второто полувреме (64 минута) на средбата со Специја, но и тој не успеа да му помогне на Удинезе да дојде до позитивен резултат на дуелот во Удине. Гостите направија изненадување и со погодоците на Галабинов се изборија за победа од 2-0.

За Специја ова се први историски бодови во Калчото, а што е уште поважно до нив дојдоа и со играч помалку со оглед нa тоа што Терци беше исклучен во 66 минута.