Интер лесно победи, ќе го пречека Јувентус како лидер на табелата

Мајсторскиот гол на Федерико Димарко го одблежа натпреварот меѓу Интер и Фрозиноне кој се одигра на „Сан Сиро“, а ремек-делото на дефанзивецот му помогна на фаворитот да има многу полесно второ полувреме.

Левиот бек успеа да постигне неверојатен гол од 56 метри и достави кандидатура за погодок на сезоната во Италија, па носени од ова, играчите на Интер брзо постигнаа и втор на стартот на вториот дел.

Хакан Чалханоглу погоди од пенал и ја потврди победата за фаворитот, кој со овој триумф се врати на врвот во домашното првенство, откако вчера Јувентус за момент преноќи на првото место.

Со денешната победа, Интер повторно е на првото место со 31 освоен бод, два повеќе од Јувентус кој исто така фати залет во последно време и се издвојува како претендент за титулата.

Интересно, овие два тима играат големо дерби во Торино за две недели, па тогаш ќе биде уште појасно каков е распоред на силите во овој момент.