Инѕаги верува во нова „Перуџа“ и прво скудето со Интер

Победата на Сардинија му овозможи на Интер да се надева на кикс на Милан во последното коло, а со тоа и евентуална одбрана на титулата во Серија А.

Тимот на Симоне Инѕаги го победи Калјари, но за скудетото ќе му треба победа во последното коло и пораз на Милан против Сасуоло.

Тренерот на „нероазурите“ се потсети на своето искуство како играч на Лацио од 2000 година, потенцирајќи дека постои реална можност Милан да загуби на „Мапеи“.

– Такво нешто веќе се има случено. Јас ја освоив титулата со Лацио, имавме два бода помалку, а Јувентус загуби во Перуџа, тоа може да се повтори, – изјавил Инѕаги.

Предводникот на Интер потсети на контроверзниот натпревар меѓу Перуџа и Јувентус, чиј старт беше првично одложен поради силниот дожд. Судијата Пјерлуиџи Колина одлучи средбата сепак да се игра по тешки услови при што домаќините се снајдоа подобро и го оставија Јувентус без титула.

Интер во последното коло ја пречекува Сампдорија која веќе обезбеди опстанок во Серија А.