Инѕаги може да му пресуди на Фонсека, но и да постави нов историски рекорд против Милан

Симоне Инѕаги замолкна голем број експерти со резултатите кои ги оствари во Интер и веќе е најтрофеен тренер во историјата на клубот, но овој викенд може да достигне уште еден податок за аналите.

Интер во недела ќе одигра голема дерби пресметка против Милан и на хартија ќе ја има улогата на домаќин, а доколку актуелниот шампион оствари победа, Инѕаги ќе оствари достигнување кое не го забележал ниту еден тренер во историјата на „Дерби дела Мадонина“.

Инѕаги брка седма победа во низа на дерби дуелите против Милан и доколку го оствари тоа ќе биде првиот во историјата со таков учинок, бидејќи досега успеа да слави победа над „росонерите“ на последните шест меча.

Интер беше двапати подобар минатата сезона со 5:1 и 2:1, претходно двапати славеше во Лигата на шампионите 2:0 и 1:0, како и по еднаш во домашното првенство со 1:0 и во италијанскиот Суперкуп со 3:0

Инѕаги ќе брка седма рекордна победа во низа против вечниот ривал од истиот град, а доколку успее да го направи тоа, најверојатно ќе му пресуди на Пауло Фонсека кој веќе е под сериозен притисок во Милан.