Инѕаги ќе се бори за трофеј на стартот на 2025. година: Целите се исти како оние пред три ипол години

Интер ги доби последните три изданија на Суперкупот, а тимот на Симоне Инѕаги влегува како голем фаворит за повторување на таков успех и пред мини-турнирот кој ќе се игра во Ријад.

Саудиска Арабија повторно е домаќин на полуфиналињата и финалето на Суперкупот, со тоа што програмата ќе стартува утре со големо дерби меѓу Интер и Аталанта.

Инѕаги се навикна да го подигнува овој трофеј во последните три години, па иако знае дека ќе биде тешко, се надева дека тоа ќе го повтори по четврти пат во низа.

– Целите во 2025-та година се истите оние од денот кога дојдов пред три и пол години. Целта е да го претставуваме Интер на најдобар можен начин и да се стремиме да го дадеме максимумот. Во моментов се обидуваме да победиме на што е можно повеќе натпревари, да освоиме што е можно повеќе трофеи за фановите. Најблиску ни е трофејот за кој ќе се бориме на стартот на годината, Суперкупот има големо значење за нас.

– Ќе се соочиме со тим кој игра во извонредна форма, како во домашното првенство, така и во Лигата на шампиони. Аталанта ги доживеа најголемите успеси во последно време, но игра врвен фудбал со години. Ќе биде многу тешко да играме против нив, но ќе се обидеме да го прикажеме Интер во најдобро светло, – изјави Инѕаги.