Инѕаги: Доминиравме, Зомер се одмараше, ама…

Интер го совлада Јувентус со 1-0 во дерби средбата во италијанската Серија А, резултат со кој домаќините ја зголемија предност во однос на клубот од Торино кога се работи за самиот врв во Калчото.

Автоголот на Гати во првото полувреме ја реши пресметката на „Џузепе Меаца“ по која „нероаѕурите“ сега имаат четири бода повеќе од „бјанконерите“, плус натпревар помалку што значи дека имаат можност за позитива од седум што може да биде пресудна во борбата за Скудетото.

-Остваривме победа, важна и сосема заслужена. Многу сме задоволни од начинот на кој се подготвувавме, игравме и ја контролиравме играта. Навивачите не туркаа од загревањето до последниот судиски свиреж. Сепак ова е само еден чекор во долгото патување. Јуве и Милан нема да се предадат, -истакна тренерот Симоне Инѕаги.

-Шчесни го одржуваше натпреварот отворен со неговите неверојатни одбрани по ударите на Арнаутовиќ и Барела, но можев да видам дека мојот тим е фокусиран. На Јувентус му дозволивме еден контранапад во 95 минута. Јан Зомер малку се одмори, но сепак знаевме дека треба да издржиме до крај. Овие момци работат на примерен начин веќе седум месеци, но мораме да продолжиме. Ова е само отскочна штица. Има уште четири интензивни месеци. Мора да продолжиме вака. Добивме 18 од 22 натпревари во Серија А, но и покрај тоа сме на дофат на Јувентус и Милан. Минатата сезона Наполи имаше далеку поголемо водство на врвот во оваа фаза, -додаде Инѕаги кој се надева дека со добрите партии ќе продолжат и во ЛШ.

-Тоа е целта. Лигата на шампионите е многу важна фаза за нас, имавме исклучителна серија минатата сезона и веќе знаеме дека имаме многу тежок противник во осминафиналето, -порача Симоне за „ДАЗН“.