Имобиле искрен: Се прашувам дали постапив добро што останав во Лацио!

Чиро Имобиле има најслаб старт на една натпреварувачка сезона со Лацио, па иако со години е најдобар голгетер меѓу „небесно сините“, фудбалот уште еднаш не потсетува дека добрите работи брзо се забораваат.

Италијанскиот репрезентативец веќе беше предмет на први критики и дури доби и свирежи од дел од навивачите на Лацио, а самиот Имобиле сега признава дека тоа многу тешко го поднел.

Во интервјуто за „Ил Месаџеро“, Чиро открива дека сега си го поставува прашањето кое воопшто не го замислувал во месец јули, односно кога доби неколку примамливи понуди од Саудиска Арабија за да му се придружи на Сергеј Милинковиќ Савиќ во новата авантура.

– Се работи за мал дел од навивачите на Лацио кои испратија свирежи до мене, а не знам дали и можат да се наречат фанови кога ме свират мене. Мислам дека вистински фан на Лацио нема да ме третира така. Само прашање на време е кога повторно ќе бидам оној истиот, ќе ги демантирам и најскептичните фанови.

– Ги разгледував опциите од Саудиска Арабија кои ги имав минатото лето, но решив брзо да ги одбијам. Тоа го направив за да останам во Лацио, да играм во Лигата на шампионите и за италијанскиот тим. После овој старт на сезоната, вистина е дека си поставувам одредени прашања, особено после критиките кои ги добивам. Ме боли тоа што се споменуваат и парите, сега моите мисли не се исти како во јули. Понекогаш се прашувам дали направив добро што останав во Лацио, се прашувам дали ќе беше подобро ако си заминев, – признава Имобиле.