Играчот за кој се шпекулираше дека е мртов се врати на тренинзите на Јунајтед: Минав низ тежок период

Тајрел Маласија беше избор на Ерик Тен Хаг и му се приклучи на Манчестер Јунајтед летото 2022-ра година, пристигнувајќи како надежно засилување од редовите на Феенорд.

Јунајтед плати околу 15 милиони евра за талентираниот лев бек кој имаше и добри настапи во првата сезона, но после тоа го заследија низа малери, кои направија да не заигра фудбал во изминатите 18 месеци.

Маласија заработи тешка повреда на коленото и поради истата ја пропушти цела измината сезона, а иако беше план да се врати минатово лето, дефанзивецот мораше да направи уште една операција за влошување на проблемот.

Како што стојат работите, МАласија ја остава оваа голгота зад себе и се почесто е на тренинзите со првиот тим, но бидејќи веќе одиграл и 45 минути за младинскиот тим на Јунајтед, „Атлетик“ реши да направи интервју со Холанѓанецот.

– Минав низ тежок период и морав да имам многу трпение. Во овој период сфатив дека имам повеќе трпение од било која личност во светот. Ние фудбалерите сме навикнати на повреди, но оваа повреда побара посебно внимание. Откако изгледаше дека сум при крај, морав да направам нова операција. Не сакавме да брзаме, со клубот се договоривме да одиме чекор по чекор. Сега ми оди одлично, се чувствувам многу добро и одиме малку по малку, – вели Маласија, кој во овој долг споменат период, беше предмет и на теории на заговор.

Поради прескромните информации кои ги даваше Јунајтед како клуб за неговата повреда, во јавноста е појавија и шокантни информации за негова смрт, но и шпекулации дека избегал во непознат правец со Кејт Мидлтон во периодот кога таа се криеше од јавноста поради борбата со рак.

– Ништо од тоа што се пишуваше не беше точно. Јас правев само едно, бев посветен на рехабилитацијата. Кога бев во Холандија, бев близок со семејството и само тренирав, јадев, спиев и се дружев со семејството. Тоа беше единственото што го правев во тој период, – открива Маласија.