Играчите на Звезда добиле високи премии за победата над Штутгарт, ќе следат уште поголеми ако направат сензација на „Сан Сиро“

После четири порази во Лигата на шампионите, од кои три беа навистина тешки, Црвена Звезда пред две недели ја запиша првата победа во групната фаза, и тоа на начин на кој ги воодушеви своите навивачи.

Српскиот првак го декласираше Штутгарт со 5:1 и испорача „петарда“ во мрежата на Германците, па тоа сигурно прави играчите на овој тим да отпатуваат со далеку поголема самодоверба во Милано.

Црвена Звезда утре ќе му гостува на Милан на „Сан Сиро“, а во најавата за овој натпревар, пристигна информации за исплатени премии на сметка на играчите за премиерната победа во ЛШ, но и најави за уште поголеми доколку се случи сензација утревечер.

Водечките луѓе на Црвена Звезда одлучиле половина од бонусот кој се добива за победа во Лигата на шампиони да го прераспределат на сметките на играчите, со тоа што стартерите добиле по 65 илјади евра, а резервите двојно помалку.

УЕФА за три бода во најелитното натпреварување исплаќа по 2,1 милиони евра на сметка на клубовите, па играчите и стручниот штаб на Црвена Звезда поделиле нешто повеќе од 1 милион евра.

Како што јавува угледниот „Спорт Клуб“, играчите на првиот тим добиле уште поголема мотивација бидејќи премиите биле исплатени веќе следниот ден по победата над Штутгарт, но и ветување дека ќе добијат уште поголеми бонуси ако утревечер успеа да го изненадат Милан на негов терен.