Играчите на Хајдук испратени со свирежи од „Пољуд“, Гатузо порача: Ракитиќ не е во форма (Видео)

Хајдук изгледа навистина ранливо и невоиграно на стартот на вториот дел од сезоната, но иако вчера беше запишана првата победа во 2025-та година, навивачите на „Пољуд“ не го криеја разочарувањето од ужасното издание на нивните миленици.

Сплитскиот великан со 1:0 го совлада Вараждин и за момент се искачи на првото место на табелата, но разочарувачкото издание им донесе серија свирежи на фудбалерите, но и на тренерот Џенаро Гатузо.

Севкупниот заклучок на угледните хрватски медиуми е дека неколку првотимци на Рино се далеку од посакуваната форма, а италијанскиот стручњак по натпреварот посебно го издвои искусниот Иван Ракитиќ.

– Ракитиќ не е во форма и тоа веднаш се одразува врз играта на тимот. Премногу се троши во дуелите на средината на теренот и трча беспотребно.

– Не е на највисоко ниво, но и во такви услови тој е круцијален играч за нас. Иако не е во форма, покажува волја за игра, а притоа има и голема харизма и искуство, – изјавил Гатузо во соочувањето со хрватските новинари.