Играч на Баерн се збогуваше со фановите на „Алијанц арена“: Никогаш не сме добиле толку понуди за еден фудбалер

Баерн Минхен рутински се справи со Слован во Лигата на шампиони и запиша победа за крај на првата фаза во најелитното натпреварување, а овој натпревар се чини беше последен за Матис Тел како играч на баварскиот великан.

Талентираниот француски напаѓач остана на теренот подолго од сите свои соиграчи и се збогуваше со навивачите на Баерн, што многумина го протолкуваа како негово одјавување од „Алијанц арена“.

Тел има голем број понуди на маса и сака да си замине во клуб во кој редовно ќе добива шанса, а дека ситуацијата навистина е променета за разлика од пред неколку недели, потврди и спортскиот директор Макс Еберл.

– Зборувавме со Тел во декември и тој ни порача дека сака да се етаблира во првиот тим на Баерн. Неколку недели подоцна, сега самиот ни вели дека сака да си замине. Ќе ги разгледаме сите опции и ќе одлучиме кој чекор ќе го повлечеме.

– Сега ни вели дека не е задоволен од минутажата и можеме да го сфатиме тоа. Иако ние сакаме да остане и да се бори, сепак го сфаќаме и неговото размислување. Да бидам искрен, никогаш не сум добил толку повици и толку понуди за еден фудбалер, – открива Еберл.