Игор Вори издржа само пет натпревари на клупата на Загреб

Легендарниот хрватски ракометар, Игор Вори не издржа многу на клупата на ППД Загреб и по само пет официјални натпревари заработи отказ од клубот.

Вори во Загреб пристигна како наследник на Веселин Вујовиќ, но во ниту еден момент не покажа дека поседува тренерско знаење и пред се искуство за да го извади клубот од позицијата во која западна.

Во финалниот турнир во СЕХА лигата Вори со Загреб забележа два порази, од кои едниот од Вардар со што се пласираше на четвртата позиција, а серијата порази продолжи и во Лигата на шампионите каде загубија на три натпревари.

– Игор Вори повеќе не е тренер на ракометниот клуб Прво плинарско друштво Загреб. По консултациите и разговорите водени низ оваа недела, сега со веќе поранешниот тренер, управата на клубот и Игор Вори дојдоа до заеднички заклучок дека се неопходни промени за екипата да се подготви за претстојните натпревари, -стои во дел од соопштението од ППД Загреб.