Игокеа го освои Аеродром, следи клучен меч за МЗТ за опстанок во елитата

Уште од самиот старт беше предодредено дека МЗТ Скопје ќе се бори за опстанок во АБА лигата, но за жал се чини дека оваа битка станува се покомплицирана, особено по вечерашниот пораз на домашен терен.

Во еден тесен меч со доста егал кошарка во „Јане Сандански“, Игокеа на крајот успеа да го освои Аеродром и ги освои бодовите, нанесувајќи му тежок удар на МЗТ со победата од 78:84.

Гостите клучната разлика ја направија во последната четвртина во која поведоа со 11 разлика (69:80), по што стана јасно дека МЗТ ќе претрпи пораз, иако до последна минута се бореше да се врати во мечот. Со серија од 9:0 дојде на само минус два, но сепак немаше доволно сили за комплетно враќање и превсрт на чудесен начин.

Игокеа на крајот победи со 78:84, што прави МЗТ да има уште една, последна шанса за обезбедување разигрување, или опстанок во АБА елитата.

Македонскиот првак следниот викенд гостува кај Борац, дуел кој ќе биде директна пресметка меѓу двата последно рангирани тимови на табелата.