Иџе грмеше на Монца: Стефановски имаше најдобар старт на дождот! (ВИДЕО)

Првата трка од првенството на ТЦР Италија и вчера имаше драматична квалификациска сесија со променливи временски околности, а и денес дождот пристигна на самиот старт од настанот.

Во такви услови блесна македонскиот пилот Игор Стефановски Иџе, кој изби во водство од четвртото место и ја поведе трката во првите два круга. Носителот на пол позицијата Ерик Бриљадори „потона“, додека Матеа Полони во вториот автомобил на Ауди првите два круга се обиде да му парира на Иџе, но потоа се откажа од следењето откако на крајот од стартно целната рамнина не можеше да го запре возилото и помина од задната страна на шиканата.

Сувереното водство на Стефановски беше компромитирано со сушењето на патеката, по што му се доближи Салваторе Тавано, , кој очигледно беше побрз и без потешкотија го престигна нашиот возач, за веднаш потоа и да се одвои на две секунди пред него. Со ваков поредок се влезе во последните пет минути од трката, кога тројката од Кевин Чекон, Анти Бури и Ерик Бриљадори се доближи до Иџе, а при еден поширок излез од свиокот „варијанте Аскари“ ривалите добија шанса да го загрозат. Само еден километар подоцна, на стартно целната рамнина Иџе по втор пат не можеше стабилно да влезе во првата шикана, каде што патеката била особено гумирана на сува, а на дожд е премногу лизгава, и отиде зад шиканата, со што сите го престигнаа и тој се најде на петтото место.

Во последниот круг Бриљадори го престигна Бури за второто место, но тука не престанаа проблемите за Финецот: Чекон и Иџе напредуваа по една позиција (на трето и четврто место) бидејќи на Бури му беше доделена казна и му беше додадено време на конечниот резултат.

Втората трка се вози утре со почеток во 10.10 часот.