Ибрахимовиќ со порака до играчите на Милан: Менталитетот ќе биде клучен

Златан Ибрахимовиќ вторпат одработи обврските кон новинарите во отсуство на Сержо Консеисао, па така легендарниот Швеѓанец доби шанса да биде човекот кој го најави клучниот меч за Милан во Лигата на шампиони.

По поразот од 1:0 во Ротердам, Милан утре на „Сан Сиро“ ќе брка негатива за пласман во осминафиналето, но Златан верува дека овој нов тим може да направи голема работа утревечер, особено ако биде носен и туркан од 80 илјади навивачи на трибините.

– Чудна ситуација е за мене да се појавувам на пресот, но нашиот тренер е на пат од Португалија каде беше на погреб на својот пријател Пинто да Кошта.

– Тој ќе биде утре на натпреварот, а на истиот ќе биде важно да бидеме поттурнати од фановите. Сигурен сум дека 80 илјади навивачи ќе бидат на стадионот и дека ќе ни дадат голема поддршка.

– Играчите мора да го имаат правилниот менталитет за да направат пресврт. Мора да мислат дека играат финале. Убаво е да се игра добро, но поважно е да се победи, утре мора да минеме понатаму. Почнуваме со гол негатива, но веруваме дека можеме да направиме пресврт. Треба да бидеме колективно добри, но и индивидуално несебични. Дури и тие кои се на клупата ќе мора да притискаат, така се создава победнички тим, – изјави Ибра.