Ибрахимовиќ: На Милан му е потребен…

Милан игра променливо во актуелнава сезона, а таквите изданија дефинитивно направија уште во оваа фаза да заостанува зад водечките екипи во Серија А, па и во Лигата на шампионите.

На „росонерите“ им е тешко да спојат две-три квалитетни партии во низа и доказ за тоа беше последната недела пред репрезентативната пауза каде прво го добија Реал Мадрид на „Сантијаго Бернабеу“ за да потоа кикснат и освојат само бод против Калјари иако поситигнаа три гола на ова соочување.

Златан Ибрахимовиќ како еден од водечките луѓе на овој проект е свесен дека ситуацијата мора да се подобри и воедно посочи кој е главниот проблем на екипата.

-Работиме секој ден за да постигнеме рамнотежа и стабилност. На тимот му оди добро, но ние можеме подобро и тоа е она што го сакаме. Биланс. Губиме натпревари кои не треба да ги губиме. Се работи за ментална рамнотежа, кога ќе го откриеме тоа, тогаш тимот ќе биде многу, многу подобар. Но, ние сме позитивни и се подобруваме секој ден, -истакнал Ибра кој запрашан за тоа дали се потребни засилувања, во свој стил одговорил:

-Дали ни се потребни? Да не имате некакви барања? Секој е експерт и има совет. Се шегувам, трансфер пазарот е секој ден, имаме скаутинг систем за да бараме играчи, што ни треба, а што не. Сепак засега не размислуваме за засилувања. Ќе видиме што ќе се случи во следните два месеци, се надеваме дека нема да има повреди на нашите играчи. Ако се биде добро, ќе продолжиме со овој тим, -подвлекол Швеѓанецот.