Ибрахимовиќ е на добар пат да се врати во Милан

Златан Ибрахимовиќ пред неколку месеци ја заврши својата активна фудбалска кариера и тоа во италијанскиот великан Милан.

Тој во својата втора етапа во „црвено-црниот“ дрес се задржа три ипол години, период во кој имаше многу важна улога како лидер, ментор на екипата која во сезоната 2021-22 изненедувачки стигна и до Скудетото.

Во моментов Ибра нема никакви обврски, ангажман и Милан тоа сака да го искористи и да го врати во клубот. „Газета Дело Спорт“ пренесува дека Швеѓанецот е во постојан контакт со „росонерите“ во последните неколку недели и работите се движат во позитивен правец.

Останува да се види каква би била улогата на Златан со тоа што тренерот Стефани Пиоли посакува тој да биде во секојдневен контакт со тимот.

Пиоли е во одличен однос со легендарниот ас и верува дека би бил совршен во оперативната улога во близина на првиот тим.