Хуманоста и солидарноста во прв план: Дино Баскет од Кочани ќе го доигра првенството во Скопје и Струмица

Кошаркарскиот третолигаш Дино Баскет од Кочани ќе ги одигра последните два натпревари од првенството, а на истите домаќини ќе бидат противничките екипи и ќе имаат хуманитарен карактер.

Големата трагедија во Кочани донесе тешки моменти за цела држава, а екипата на Дино Баскет загуби еден млад и талентиран кошаркар, додека уште еден играч и член на стручниот штаб се борат за своите животи.

Екипите на Шкупи и Струмица Ролинг ќе бидат домаќини на кочанскиот ривал во салите каде настапуваат, при што ќе ја изразат својата поддршка и солидарност кон екипата на Дино Баскет, чии членови поминуваат низ навистина тежок период.

Шкупи ќе биде домаќин во СРЦ „Кале“ на натпревар каде нема да се наплаќа билет, додека Струмица во салата „Парк“ ќе наплаќа билет по цена од 100 денари, а собраните пари ќе бидат донирани за погодените семејства од трагичниот настан.

На влезовите во спортските сали каде ќе се одиграат двата натпревари ќе бидат поставени кутии за донации во кои секој којшто ќе влезе во салата ќе може да донира, колку сака и колку може, за оние на кои сега им е најпотребно.

Натпреварот помеѓу екипите на Шкупи и Баскет Дино е закажан за в четврток (27. март, 2025 година) со почеток во 19:00 часот. Натпреварот меѓу Струмица Ролинг и Баскет Дино е закажан за в сабота (29. март, 2025 година) со почеток во 18:30 часот.