Хујсен го издвои најтешкиот противник во кариерата: Секогаш е присутен…

Дин Хујсен е еден од младите играчи кој полека блеска на големата сцена, па откако собра искуство во Јувентус и Рома од оваа сезона е дел од премиерлигашот Борнмут каде игра навистина на високо ниво, партии со кои го привлече вниманието на големи клубови и нема да биде изненадување ако ова лето го видиме во друга средина.

Дефанзивецот наредниот месец ќе го прослави 20 роденден што говори дека е играч со огромен потенцијал, талент, а дека кариерата се движи во добар правец говори и фактот дека веќе дебитираше и за А репрзентацијата на Шпанија и тоа против Холандија во Лигата на нации.

Момчето кое е родено во Амстердам допрва ќе треба да покаже и извлече најдоброто од себе, но иако е доста млад се има соочено со доста предизвици и веќе има играч кој за него е најтежок противник во досегашната кариера.

-Мислам дека Салах има способност да создава работи, но има и способност да биде на вистинското место цело време за да добие асистенција, да постигне гол. Дури и против нас постигна два гола, и тоа од никаде. Имаше дриблинг и погоди во горниот агол. Плус пенал, секако и пенал треба да го реализираш. Ама вториот гол, дриблинг и реализација во горниот агол, изглеаше едноставно толку лесно. Дури и да нема добар натпревар за око, сепак ќе учествува. Секогаш е присутен, -порача стоперот за кого има интерес од Ливерпул, Манчестер Јунајтед, Реал Мадрид…