Хрватски третолигаш реализираше уште еден милионски трансфер

Фудбалскиот клуб Кустошија игра во третата хрватска лига и веројатно никој во Европа не би знаел за него, ако изминатиов период не реализираше неколку невообичаени трансфери.

Загрепскиот нисколигаш сега потврдил дека го продал талентираниот Фаје Кулибали во МЛС клубот Шарлот за сума од 2 милиони долари, бонуси и плус 20 проценти од неговиот иден трансфер.

За африканскиот дефанзивен играч за врска беа заинтересирани и неколку европски гиганти, но очигледно најконкретен бил Шарлот кој добива 18-годишен играч со голем потенцијал.

Кустошија го привлече вниманието на европската јавност откако го продаде Микаел Фаје во Барселона за 1,5 милиони евра, а истиот фудбалер подоцна замина во Рен за сума од 10 милиони евра, при што процент од трансферот доби и хрватскиот нисколигаш.

Продадени се и двајца млади фудбалери во редовите на РБ Лајпциг, од кои Дин Клапија го чинеше бундеслигашот 3 милиони евра, а ваквите потези не се толку изненадувачки ако се знае дека клубот е менаџиран од познатиот фудбалски агент Енди Бара.

Хрватот и неговите партнери имаат многу престижни клиенти во својата агенција, а последниот голем трансфер беше тој на Дани Олмо од РБ Лајпциг во Барселона.