Хрватска не дозволи изненадување, но македонската репрезентација го поправи впечатокот

Женската кошаркарска репрезентација доживеа пораз во квалификациите за Европското првенство од селекцијата на Хрватска, но успеа да остави подобар впечаток во споредба со претходните настапи во групата.

Македонските кошаркарки го одиграа првиот натпревар во „балонот“ во Рига, а на крајот противникот стигна до победата со резултат 80:62.

Фаворитот покажа дека оди на сигурна победа уште во првата четвртина која ја доби со 28:17, ние успеавме во еден момент да дојдеме на минус четири, но Хрватска не дозволи изненадување во второто полувреме и славеше со двоцифрена предност.

Во македонскиот состав блескаше американското засилување Девана Бонер, која го заврши натпреварот со 20 поени, 17 скокови и 7 асистенции, додека Митрашиновиќ го заврши дуелот со 15 поени.

Кај противникот доминираше Дојкиќ со 30 поени.

Нашата репрезентација по два дена ќе игра против Германија.