Хисај потврдил дека заминува од Наполи

Албанскиот интернационалец Елсеид Хисај дефинитивно ќе го напушти Наполи по крајот на оваа сезона, а за тоа е информиран и клубот.

Ова го изјавил неговиот агент, кој на медиумите им потврдил дека одлуката е донесена и Хисај следната сезона ќе настапува во друг дрес, за што дополнително ќе биде донесено конечно решение од понудите кои ги има.

Хисај е во Наполи од 2015 година, а неговиот договор истекува следниот јуни, па доколку Наполи не се согласи на трансфер ова лето, ќе мора да го ослободи дефанзивецот без отштета во јуни, 2021 година.

– Го информиравме клубот дека нема да го продолжиме договорот, затоа што Хисај сака да замине, – изјавил Марио Џуфреди.

Наполи сега ќе треба да преговара со заинтерисираните клубови во обид да биде одредена трансфер сума која ќе им одговара и на двете страни, со што италијанскиот клуб ќе ја избегне можноста да не заработи ништо за Хисај, посебно во ситуација кога прекинатото првенство ги намалува приходите.