Херојот на Шведска со бурни емоции по драмата во финалето: Не сум плачел вака ниту како дете (Видео)

Шведска имаше повеќе херои на Европското ракометно првенство кое го заврши на најпосакуван можен начин, бидејќи „викинзите“ со вчерашната победа во финалето над Шпанија стигнаа до првата континентална титула по пауза од цели две децении.

Швеѓаните ја детронизираа Шпанија од титулата европски првак и славеа во крајно драматична завршница, во која улогата на трагичар му припадна на Канељас, а херои беа двајца играчи на тимот предводен од селекторот Глен Солберг.

Екберг ја презема одговорноста и го постигна клучниот пенал за победа по истекот на регуларните 60 минути, но во текот на мечот главен херој беше голманот Паличка кој сосема заслужено беше избран и за играч на мечот.

Искусниот голман доста емотивно ги доживеа сите моменти по големата победа, па во интервјуто за шведската телевизија признал дека бил шокиран од сите случувања во изминативе три недели.

– Се бориш цела кариера, победуваш, губиш, се подигнуваш и паѓаш. Мислам дека се разболев од количината на емоции кои ги чувствувам. Чувството е неверојатно, мислам дека сум на раб од шок после се што се случи. Ниту како дете не сум плачел како денес, бидејќи не можев да сонувам дека ова ќе ми се случи во животот,  – изјавил емотивниот Паличка.

🔊🏆 @hlandslaget 🇸🇪#ehfeuro2022 #watchgamesseemore pic.twitter.com/xAINEhaaZp

— EHF EURO (@EHFEURO) January 30, 2022