Хенман: Ѓоковиќ израсна како аутсајдер, не би се обложил на Надал и Федерер

Некогашниот најдобар британски тенисер, Тим Хенман даде свој коментар за трката за најголемиот, најквалитетниот рекет на сите времиња.

Многу се зборува на оваа тема, некои сметаат дека секоја ера е посебна и не може да се споредува едно со друго време, некои пак зборуваат, дебатираат за тројката Рожер Федерер, Рафаел Надал и Новак Ѓоковиќ кои се тенисерите со најмногу освоени грен слем титули.

Швајцарецот и Шпанецот во моментов се на врвот со 20 пехари, додека пак Ѓоковиќ кој е помлад од нив е на бројката од 17 триумфи на најзначајните турнири.

-Кога ќе ја погледнете оваа ера, генерацијата на Федерер, Надал и Ѓоковиќ, рекордите што ги поставија, тоа е неверојатно, -започна Хенман.

-Мислам дека тоа е мотивирачки фактор за сите нив, а особено за Ѓоковиќ. Некако израсна како аутсајдер и во таа улога долго време се бореше против Федерер и Надал. Новак сака да сруши дел од рекордите. Федерер и Надал се враќаат, но не би се обложил дека нема да ги престигне, -заклучи Хенман кој освои 11 АТП титули во кариерата, а највисокиот пласман му беше четвртото место на ранг листата.