Хендерсон го искоментира ставот на Канте и Дини, двете ѕвезди кои одбиваат да се вратат на тренинзи

Враќањето на премиерлигашите на тренинзите донесе измешани реакции во јавноста, но иако најголем дел од играчите со нетрпение чекаа да се вратат на секојдневната рутина, има и такви кои се преплашени од коронавирусот и кои не сакаат да ризикуваат воопшто во дадената ситуација.

Јирген Клоп ги охрабри сите свои исплашени играчи (доколку има такви) да останат дома и дека поради тоа нема да добијат никаква казна, но додека во Ливерпул цел тим е расположен за тренинзи, најзвучни примери за одбивање на тренинг рутината се Нголо Канте и Трој Дини.

Фудбалерите на Челси и Вотфорд не се чувствуваа безбедно и засега не се враќаат на тренинзите, став кој сега го искоментира капитенот на Ливерпул, Џордан Хендерсон.

– Максимално го почитувам нивното мислење на оваа тема. Секој е во различна ситуација со своето семејство, ако не се чувствувате безбедно, нема потреба да бидете приморани да доаѓате на работа. Комплетно ги почитувам момците кои не се чувствуваат безбедно, но исто така се надевам дека и тие го почитуваат моето мислење.

– Секој различно ја согледува ситуацијата, но јас се чувствувам многу безбедно во тренинг центарот. Во спротивно, немаше да доаѓам, а истото важи и за соиграчите, – потенцира Хендо за „Скај Спортс“.