Хелмут Марко: Ферстапен е преплашен, најдобро ќе биде да се зарази од коронавирус!

Хелмут Марко доста често не внимава со изјавите кои ги дава во јавноста и е познат по тоа што предизвикува различни реакции со своите ставови, а во таа насока оди и последната изјава која ја даде за еден од двајцата најталентирани возачи во Формула 1.

Легендарниот Австриец како советник на Ред Бул има исклучително близок однос со Макс Ферстапен, па сега обидувајќи се да долови во каква психолошка состојба се наоѓа младиот возач на тимот, Марко навистина не внимаваше со зборовите кои ги избра во силен ек на пандемијата поради која се одложени и сите трки во Формула 1.

– Макс по телефон ми кажа дека е преплашен од коронавирусот, преплашен е дека може да се зарази. Но најдобро за него ќе биде да се зарази сега. На 22 години, тој не е во групата на критични. После тоа ќе биде имун на се и ќе има чист пат во обидот да стигне до титулата во новата сезона, – изјави Хелмут Марко за „Kronen Zeitung“, коментар со кој експресно наиде на многу критики во јавноста.